दाङ, २५ साउन ।

प्रसिद्ध धार्मिकस्थल पाण्डवेश्वर महादेव मन्दिर धारापानीमा यही साउन २ गते देखि पुरुषोत्तम माहात्म्य प्रवचन एवम् शृङ्गारिक गंगा आरती बोलबम महोत्सव आयोजना गरिएको छ । मन्दिरमा सुरु भएको गंगा आरती हेर्ने भक्तजन तथा दर्शनार्थीहरुको बाक्लै घुइँचो लाग्ने गरेको छ ।

यही साउन ३० गते १ करोड बत्ती बाल्ने कार्यक्रम रहेको मन्दिर व्यवस्थापन समितिले जनाएको छ । दाताहरुको दानबाट संकलन भएको बत्ती बाल्ने मन्दिर व्यवस्थापन समितिले जनाएको छ । जसमा एक लाख बत्ती दान गर्ने दाताले आठ हजार आठ सय ८५ रुपैयाँ जम्मा गर्नुपर्ने छ । ५० हजार बत्ती दान गर्ने दाताले चार हजार आठ सय ५५ जम्मा गर्नुपर्ने छ भने २० हजार बत्ती दान गर्ने दाताले एक हजार ५ रुपैयाँ जम्मा गर्नुपर्ने आयोजकले जनाएको छ ।

मलमासको समयमा मात्र सञ्चालन गर्न मिल्ने महामहोत्सव पाण्डवेश्वर महादेव मन्दिर धारापानीमा यसवर्ष पहिलो पटक सञ्चालन भएको हो । साउन २ गतेदेखि मन्दिरमा साँझ नियमित रूपमा शृङ्गारिक गंगा आरती, मण्डव पूजा तथा हवन सञ्चालन, पुरुषोत्तम माहात्म्य पाठलगायतका कार्य भइरहेको मन्दिर व्यवस्थापन समितिका अध्यक्ष तथा महामहोत्सव मूल व्यवस्थापन समितिका संयोजक गणेशकुमार अधिकारीले बताए ।

मन्दिरको प्रचारप्रसार तथा धर्म र धार्मिक आस्था थप सुदृढ बनाउने उद्देश्यले पुरुषोत्तम महात्म्य एवं शृङ्गारिक आरती बोलबम मासिक महामहोत्सव सञ्चालन गरेको महामहोत्सव मूल व्यवस्थापन समितिका संयोजक गणेशकुमार अधिकारीले जानकारी दिए ।

उनले भने, ‘मलमासको समयमा मात्रै सञ्चालन हुने भएकाले धारापानी धाममा महामहोत्सवको आयोजना गरेका हौं ।’ महामहोत्सवमा अन्तर्राष्ट्रिय स्वर्णपदक विभूषित पण्डित अमृतशरण देवाचार्यले पुरुषोत्तम माहात्म्य प्रवचन दिइरहेका छन् । त्यस अवसरमा वाराणसी समूहले प्रत्येक दिन बेलुकी वैदिक शृङ्गारिक गङ्गा आरती गर्ने गरेको संयोजक अधिकारीले बताए । उनका अनुसार महामहोत्सव अवधिभर मण्डव पूजा तथा हवन सञ्चालन, पुरुषोत्तम माहात्म्य पाठ पारायण, सङ्गीतमय लीलामय पुरुषोत्तम माहात्म्य प्रवचन, पुरुषोत्तम एवम् बोलबम महाआरती र सङ्गीतमय लीलामय प्रवचन तथा भजन सञ्चालन भैरहेको छ ।

धारापानीमा आउने पर्यटकका लागि आकर्षक थपिएको छ, सन्ध्या आरती । मनोरम दृश्यावलोकनबाट भ्रमणको शुभारम्भ गरेका पर्यटकहरु मठमन्दिर, विश्वको अग्लो त्रिशुल, एक सय आठ गौमुखी धारा, ओमकार पोखरी र अन्य मठ मन्दिर अवलोकनपश्चात साँझ भने सन्ध्याआरतीमा सहभागी हुने गरेका छन् ।

धारापानीको मूल मन्दिरको प्राङ्गणमा प्रत्येक दिन साँझ तीन जना युवा पण्डितबाट सङ्गीतमय धुनमा हुने सन्ध्या आरतीमा पछिल्लो समय भिड लाग्ने गरेको छ । आरती दर्शन गर्न विभिन्न उमेर समूहको रोजाई परेको छ ।

धारापानी मन्दिर व्यवस्थापन समिति सचिव विष्णुराम आचार्यका अनुसार भारतको प्रसिद्ध धार्मिकस्थल हरिद्वारबाट दुई जना र बनारसबाट एक जना गरेर तीन जना पण्डितले दैनिक आरती गर्ने गरेको बताए । उनका अनुसार आरतीमा धुप, घिउ, कपुर, मयुरपङ्ख, ल्वाङदानी, सेतोचमर, अलैँचीदाना र फूलपातीलगायतका विभिन्न सुगन्धित वस्तुको प्रयोग गरिन्छ । शङ्ख ध्वनीबाट शुभारम्भ हुने आरती समापनपछि भजन गाएर भक्तजनलाई नचाएर मनोरन्जन दिने गरिएको छ ।

भक्तजनको साथ र सहयोगले नै निरन्तरता दिन सकेको उनले बताए । भक्तजनबाट सहयोग प्राप्त भएको रकमबाट काम अगाडि बढेको सचिव आचार्यले बताए । दैनिक हुने आरतीमा भाग लिन चाहने भक्तजनले सचिवालयमा सम्पर्क गरेर (आठ हजार रुपैयाँ) दान गरेमा एक दिनको आरती संकल्प गर्ने व्यवस्था गरेको उनले बताए । २०८० साउन २३ गते सम्म १५ लाख ९३ हजार रकम संकलन भएको सचिवालयले जनाएको छ । दाताहरुको सहयोगबाट चलेको मन्दिरलाई दाताकै साथ सहयोग चाहिने व्यबस्थापन समितिले जनाएको छ ।