दाङ,२८ साउन । जिल्ला अदालत दाङका न्यायाधीश कृपासुर कार्कीले सही सत्य र तथ्यमा आधारित भई न्याय सम्पादनमा ध्यान दिनुपर्ने बताए । नेपालमा चिकित्सा लापरवाही र चिकित्सा उपचारसंग सम्बन्धित अपराधमा कानूनी व्यवस्था बारेमा घोराहीमा आईतबार आयोजित कार्यक्रममा न्यायाधीश कार्कीले जिम्मेवार रुपमा न्याय सम्पादन हुन सकेको अवस्थामा कुनै पनि पीडितले अन्याय सहनु नपर्ने बताए ।

उनले भने,‘जनहीत हुने गरी कानूनले निर्देशित कुरामा रहेर न्यायपालिकाले कार्य सम्पादन गरेको अवस्थामा मात्रै कोही कसैले प्रश्न गर्ने ठाउँ रहँदैन । यसमा हामी सबै सजग रहनुपर्छ । किनभने हरेकले न्यायको अन्तिम भरोसा न्यायालयसँग गरेको हुन्छ । यसमा हामी कुनै पनि अवस्थामा प्रभावित हुन मिल्दैन र गर्नु पनि हुँदैन ।’

पछिल्लो समयमा उपचारका क्रममा हुने त्रुटीलाई लिएर न्यायालयसम्म पुग्ने गरेका घटना बढ्दै गएको प्रति उनले चासो व्यक्त गरे । ‘सकेसम्म कोही पनि न्याय माग्न अदालत धाउनुु नपरोस् भन्ने तर्फ नै लाग्नुपर्छ तर यति हुँदाहुँदै पनि मानिसलाई अन्याय भएको महसुस भएको अवस्थामा अदालतले न्याय दिन बिलम्ब गर्नुहुँदैन । यसका लागि न्याय सम्पादनको सबै श्रोत, प्रमाणका आधारमा गर्नुपर्छ’, उनले भने । बिरामीको उपचारका क्रममा हुने हेलचक्र्याइँ वा लापरवाहीका बारेमा स्पष्ट हुन सकेको अवस्थामा धेरै समस्या त्यहीबाट समाधान हुने र अदालती प्रकृयामा पनि न्याय सम्पादन गर्न सहज हुने बताए । ‘इलाजसम्बन्धी कानुनमा पछिल्लो अभिलेखलाई सबैले आत्मसात गरेर अघि बढ्ने सन्दर्भमा कानून व्यवसायी, सरोकार निकाय र आम नागरिक पनि यस बारेमा जानकार हुनुपर्छ, उनले भने, कानूनलाई कोही कसैले हातमा लिएर काम गर्नुहुदैन। यसका लागि सही न्याय निरुपण गर्न पहिलो दायित्व कानून व्यवसायीहरुको पनि हो ।’

चैतन्य कानूनी सेवा तथा अनुसन्धान केन्द्रको आयोजना तथा नेपाल पत्रकार महासंघ दाङ शाखा र नेपाल बार एशोसियसन घोराहीको सहजीकरणमा भएको कार्यक्रम नेपाल पत्रकार महासंघ जिल्ला अध्यक्ष दुर्गालाल केसी, जिल्ला प्रहरी कार्यालय दाङकी प्रहरी निरिक्षक मिरा खड्का, बार एशोसिएसन घोराहीका मुरली घिमिरेलगायत बोलेका थिए । सेमिनारमा चैतन्य कानूनी सेवाका निकेश लम्सालले मेडिकल उपचारका क्रममा आई पर्ने समस्या, यसका कानूनी अवस्था, विद्यमान कानूनी प्रावधानका बारेमा प्रशिक्षण दिएका थिए । कार्यक्रममा स्वास्थ्यकर्मी, कानुन व्यवसायी र संचारकर्मीको सहभागिता रहेको थियो ।