बुटवल, २७ साउन ।

तुलसीपुर उपमहानगरपालिकाले इन्धन लैजाने पत्रकारहरुको नामावली सार्वजनिक गरेको छ । इन्धनको दुरुपयोग भएको समाचार न्युज बुटवल टुडेले प्रकाशित गरेपछि उपमहानगरको चौतर्फी आलोचना भएको थियो ।

इन्धन वितरणमा ब्यापक दुरुपयोग गरेको र उपमहानगरपालिकाले कार्यक्षेत्र र अधिकार क्षेत्र विपरित पत्रकारलाई इन्धन दिएको महालेखा परीक्षकको कार्यालयले सार्वजनिक गरेको प्रतिवेदनमा पाइएको थियो ।

महालेखा परीक्षण प्रतिवेदनले कार्यक्षेत्र भन्दा बाहिरका पत्रकारहरुलाई समेत इन्धन बाँडेको कुरा अनियमितता भएको भनी सार्वजनिक गरेपछि त्यसको चौतर्फी विरोध भएको छ । पत्रकारहरुले लिएको इन्धनलाई ‘पत्रकार महासंघ तर्फ’ भनेर महालेखा परीक्षण प्रतिवेदनमा लेखिएपछि सोही शीर्षकमा इन्धन लिएका पत्रकारहरु छानबिन गरी नेपाल पत्रकार महासंघ दाङले नामावली नै सार्वजनिक गरेको छ ।

जसमा पत्रकार वसन्त पौडेलले ६० लिटर,  जितसागत जीएमले स्वतन्त्र पत्रकार महासंघको कार्यक्रमका लािग भनेर ८० लिटर लिएका छन् । त्यस्तै तत्कालीन नगर प्रमुख घनश्याम पाण्डेका प्रेस संयोजक ओपेन्द्र बस्नेतले एक पटक ५० लिटर, एक पटक ३० लिटर र एक पटक ४६ लिटर इन्धन लिएका छन् । त्यस्तै प्रेस सेन्टरले ५० लिटर, प्रेस चौतारी दाङले १ सय लिटर, प्रेस चौतारी लुम्बिनी प्रदेशले १ सय लिटर, अबिरल राष्ट्रिय पोष्टले ६० लिटर इन्धन लिएको खुलेको हो ।

बुटवल टुडेमा समाचार प्रकाशित भएपछि त्यसको प्रभाव स्वरुप महासंघले इन्धन लिने पत्रकारहरुबो पहिचान गरेको हो । यो आर्थिक बर्ष २०७७÷०७८ को हो ।

त्यस्तै आर्थिक बर्ष २०७८÷०७९ मा पत्रकार नारायण खड्काले प्रेस युनियनको नाममा १ सय लिटर इन्धन लिएको खुलेको छ ।

त्यस्तै राकेश बस्नेतले तीन पटक १०÷१० लिटर गरी ३० लिटर पेट्रोल लिएको खुलेको छ ।  त्यस्तै गिद्ध संरक्षण अभियानका अभियन्ता डिल्लीबहादुर रावतले पनि पटक–पटक गरी ३० लिटर लिएका छन् । त्यस्तै पत्रकार वसन्त पौडेलले भैलो खेल्न भन्दै थप ४० लिटर, ओपेन्द्र बस्नेतले २५ लिटर, शरद रेग्मीले ३० लिटर, पत्रकार महासंघका केन्द्रीय अध्यक्ष विपुल पोख्रेलले २५ लिटर लिएको खुलेको छ ।

त्यस्तै पत्रकार यज्ञ बहादुर बुढाले पटक–पटक गरी ४० लिटर, दिपक बोहरा, गणेश आचार्यले १०÷१० लिटर, निराजन डाँगीले २७ लिटर, महेन्द्र महराले १५ लिटर, श्यामलाल राणाले २० लिटर लिएको खुलेको छ । त्यस्तै सुमन केसीले पटक–पटक गरी २० लिटर, प्रेमबहादुर राम्जाले १० लिटर लिएको खुलेको छ ।दिपक बोहोरा  अहिले लुम्बिनी प्रदेशका अर्थमन्त्रीका प्रेस सल्लाहकार समते हुन् । उनीसंग सवारी साधन छैन् । तर उनले पनि इन्धन लगेको उपमहानगरपालिकाले जनाएको छ ।