काठमाण्डौ, २७ साउन । काठमाण्डौमा सम्पन्न पाँचौं धनलक्ष्मी स्मृति राष्ट्रिय स्क्वास प्रतियोगितामा एकलतर्फ नेपालका नम्बर एक स्क्वास खेलाडी अरहन्त केसर सिम्हा च्याम्पियन भएका छन । सातदोबाटोस्थित नेपाल स्क्वास रयाकेट संघको एकेडेमीमा शनिवार सम्पन्न फाइनलमा अरहन्तले दीपक थापालाई ३—० को सोझो सेटमा हराउँदै च्याम्पियन हुनुभएको हो ।

अरहन्तले दीपकमाथि लगातार ११–६, ११–४ र ११–८ अंकको जित निकाले । महिला एकलमा कृष्णा थापाले उपाधि रक्षा गरिन । फाइनल खेलमा विपना ब्लोनमाथि ३—० को सोझो सेटमा सफलता प्राप्त गर्दै कृष्णा उपाधि हासिल गरिन । विपनालाई ११–६, ११–९ र ११–९ ले पराजित गरिन । पाँच खेलाडी सम्मिलित राउण्ड रोविनमा कृष्णा र विपनाले समान तीन खेल जितेपछि शीर्ष दुईमा रहेर उपाधि भिडन्त तय गरेका थिए ।

कृष्णाले गत वर्ष पनि विपनालाई नै हराएर उपाधि जितेकी थिईन । गत नवौं राष्ट्रिय खेलकुदमा पनि कृष्णा महिला एकलको विजेता हुन् । खुला एकलमा विजेताद्वय अरहन्त र कृष्णाले समान २१ हजार रुपैयाँ नगद पुरस्कार प्राप्त गरे । महिला र पुरुषमा दोस्रो हुनेले १५ हजार तथा तेस्रो हुने दुई खेलाडीले समान पाँच हजार नगद पुरस्कार प्राप्त गरे । ब्वाइज यु–१९ तर्फ पासाङ ब्लोनले उपाधि जिते । उनले फाइनलमा विकास मगरलाई ११–५, ८–११, ११–८, ११–५ को सेटमा पराजित गरे ।

पासाङले ११ हजार र विकासले ६ हजार रुपैयाँ नगद पुरस्कार प्राप्त गरे । तेस्रो हुने दुई खेलाडीले भने समान तीन हजार प्राप्त गरे । यो प्रतियोगितामा पासाङको यो दोहोरो उपाधि हो । एकदिन अघि पासाङ प्लेट विधामा पनि च्याम्पियन हुन । फाइनलमा विनायक श्रेष्ठलाई ११–८, ११–८ र ११–९ ले हराउँदै प्लेट विधामा उपाधि जितेका हुन । यसैगरी मास्टर्स (५० वर्षमाथि) एकल विधामा प्रवीणवीर सिंह कंसाकार च्याम्पियन भए । उनले फाइनलमा सुदीपबहादुर सिंहलाई ११–६, १२–१०, १०–१२, १०–६ को सेटमा पराजित गरे ।