काठमाण्डौ, २२ साउन ।  नेपालको लिग च्याम्पियन  चर्च ब्वाइज क्लबसँग एएफसी क्लब लाइसेन्स नहुदा यसको फाईदा गत सिजनको उपविजेता मछिन्द्र फुटबल क्लबले लिने भएको छ । मछिन्द्रले एफसी कपमा अवसर पाएको हो ।

एसियाली फुटबल महासंघ (एएफसी) को दोस्रो स्तरको क्लब फुटबल प्रतियोगिता एएफसी कपको पहिलो चरणको खेलमा नेपालले भुटानको पारो एफसीसँग मंगलबार प्रतिस्प्रर्धा गर्नेछ । दशरथ रंगशालामा हुने खेल साँझ ५ः३० मा सुरु हुनेछ । खेलअघि मछिन्द्रका कप्तान तथा गोलकिपर विशाल श्रेष्ठले छोटो तयारीका बावजुद जितका लागि खेल्ने बताए । उनले नयाँ खेलाडी अनुबन्धन गरेपछि क्लब थप बलियो भएको बताए । प्रशिक्षक किशोर केसीले पनि मछिन्द्र जितका लागि तयार भएको बताए । पारो एफसीमा बिदेशी खेलाडी अनुबन्धन हुदा बलियो देखिएको हुदा उनीहरुलाई रोक्ने योजनामा आफु रहेको प्रशिक्षक केसीको भनाइ छ ।

यता पारो एफसीका प्रशिक्षक पुष्पलाल शर्माले भुटानमा हाल चलिरहेको प्रिमियर लिगका कारण आफूहरुले राम्रो तयारी गर्न पाएको बताए । विजेताले दोस्रो चरणको प्लेअफमा एक सातापछि (१६ अगस्ट) भारतको मोहन बगानसँग खेल्नेछ । दोस्रो चरणको दुई विजेताबीच (२२ अगस्ट) प्लेअफ हुनेछ । प्लेअफ विजेता एएफसी कपको दक्षिण एसियाको समूह चरणमा पुग्नेछ । दक्षिण एसियाको समूह चरणमा यसअघि नै भारतको ओडिसा, बंगलादेशको बशुन्धरा किंग्स र माल्दिभ्सको माजिया पुगिसकेका छन् ।

मछिन्द्रका कप्तान विशालले भोलिको खेलमा जित निकाल्न सके नेपाली क्लब फुटबलमा राम्रो सन्देश जाने बताए । जितले अर्को चरणमा भारतीय क्लब मोहन बगानसँग खेल्ने अवसर प्राप्त हुने भएकाले नेपाली क्लबका लागि फाइदा पुग्ने उनको भनाइ छ । यसअघि मछिन्द्रले पारोविरुद्धको खेलका लागि ८ खेलाडी भित्राएको थियो । क्लबले आशिष चौधरी, एरिक विष्ट, लकेन लिम्बु, आयुष घलान, सनिश श्रेष्ठ, मेसुके ओलुमाउ, रेजिन सुब्बा र रोहित सुब्बालाई अनुबन्धन गरेको थियो ।

यस्तो छ मछिन्द्र टोली

गोलकिपर : विशाल श्रेष्ठ, प्रदीप भण्डारी

डिफेन्डर : करीम ओमोलाजा, सनिश श्रेष्ठ, दिवाकर चौधरी, देवेन्द्र तामाङ, छिरिङ गुरुङ, सुरज विक

मिडफिल्डर : एन्ड्रेस निया, उत्सव राई, दिपेश घले, लकेन लिम्बु, अरिक विष्ट

फरवार्ड : विजय भुजेल, रेजिन सुब्बा, विमल घर्ती मगर, आशिष चौधरी, आयुष घलान, मेसुके ओलुमाउ, सौरभ लिम्बु, अभिषेक गुरुङ, रोहित सुब्बा, अफिज ओलावाले ओलाडिपो