बुटवल, २७ साउन। अन्तराष्ट्रिय युवा दिवसको उपलक्ष्य पारेर नेपाल स्वयंसेवी रक्तदाता समाज रुपन्देही शाखाले १ सय २५ औ नियमित रक्तदान कार्यक्रम सम्पन्न गरेको छ । स्वस्थ्य रगत, सबैको लागि नारासहित नेपाल स्वयंसवी रक्तदाता समाज रुपन्देही शाखाको आयोजना तथा पाठक कृषि फर्म (माधव पाठक), नरेश्वर पौडेलबाट आर्थिक तथा रक्तसंचार सेवा केन्द्र, ब्लड बैकको प्राविधिक सहयोगमा कार्यक्रम भएको हो ।

समाजका अध्यक्ष कृष्ण चौहान क्षेत्रीले बिरामीलाई चढाउने रगतको गुणस्तरबारे प्रश्न उठाउनुपर्ने अवस्था आएको बताए । रक्तदाताबाट उपलब्ध रगतको परिक्षण स्थान अनुसार फरक फरक जाच हुने गरिएको भन्दै यसमा एकरुपता आउनुपर्ने उनको सुझाव दिए । ‘ल्याबको गुणस्तरीयताको विषयमा अबको मुद्दा हो ।’–उनले बताए । बिरामीलाई चढाउने रगतको हेपाटाइटिस बि र सि, भिडआरएल, सिफलिस, एचआईभी परिक्षण गरिन्छ ।

अहिले २१ दिनभित्रको एचआईभी संक्रमण भएको देखाउने मेशिन आइसकेको छ । नेपालका अधिकाश ब्लड बैकमा भने ३ महिनाभित्र एचआईभी भएमात्र देखिने प्रविधि प्रयोगमा छ । बिरामीलाई चढाउने रगतको गुणस्तरबारे सचेत हुनुपर्ने उनले बताए । पाल्पा मिशन अस्पतालमा अन्य स्थानभन्दा बढि थप रोगहरुको परिक्षण गरिन्छ । यसले गर्दा रगतको मुल्यमा फरक भएको पाउछौ । ‘अन्य ब्लड बैकमा एक पोका रगतको ७ सय २५ रुपैया हुदा पाल्पामा १ हजार ३ सय २५ रुपैया रहेको थियो ।’—उनले भने । अहिले सरकारबाट निशुल्क गरेको रगतको ब्लड बैकमा भने मूल्य ९ सय ५० रुपैया रहेको छ ।

वार्षिक ३४ हजार बढि रगत खपत भैरहेको बेला रुपन्देहीमा नया ब्लड बैक थप्ने वा सेवा बिस्तारमा जोड नदिदा बिरामीहरु पिडामा रहेको उनले बताए । यसअघि बढिभन्दा बढि रगत संकलन गर्ने, रगत अभाव कम गर्ने, रक्तदातालाई गोलबन्द गर्नेमात्र गर्दै आएकोमा अब रगत ब्यवस्थापनमा समेत चासो अघि बढाएको उनले बताए । ‘भर्खरमात्र हामीले सामुदायिक ब्लड बैकको अवधारणालाई अघि बढाएका छौ ।’—उनले भने । बिरामी र उनिहरुको आफन्तलाई सहज, सरल रुपमा रगत उपलब्ध गराउने मुख्य ध्येयका साथ सबै सरोकारवालाहरु लाग्नुपर्ने उनले बताए । रगत ब्यवस्थापनमा रक्तदाताभन्दा पनि अन्यहरुको बढि हालिमुहाली देखिएको भन्दै यसलाई तोड्न जरुरी रहेको उनले बताए ।
कार्यक्रममा संयोजक जानकी नेपालले रुपन्देहीमा नियमित साप्ताहिक रुपमा कार्यक्रम गर्न लागेको १ सय २५ हप्ता पुगेको बताइन । शनिबार भएको रक्तदान कार्यक्रममा सचिव अर्जुन प्रसाद पौडेलले ३५ युनिट रगत संकलन भएको बताए ।