बुटवलकी ममता घिमिरे मिस वेष्ट्रन नेपाल २०२३ को बिजेता बन्दै मिस नेपाल २०२३ मा प्रतिस्पर्धा गर्ने २५ जना प्रतियोगीमा पर्न सफल भएकी छिन । शनिबार भएको फिनालेमा अन्तिम ९ मध्येबाट उत्कृष्ट बन्दै उनी मिस बेष्ट्रनको ताज पहिरेकी हुन । जेठ १३ गते काठमाडौमा हुने फिनालेमा २५ जना प्रतिस्प्रधीमध्येकी उनी यस क्षेत्रकी दाबेदार हुन । अर्घाखाँची स्थाई घर भई बुटवल कालिकानगरमै जन्मेकी उनी सानैदेखि नृत्य, गाउनमा रुचि राख्थिन । कलेजमा गरिएको कार्यक्रमबाट तालिम लिएर धेरै सिक्ने अवसर पाईन। अवसर आयो र भाग्य जुरेर प्रतियोगितामा भाग लिई आफ्नो मेहनतबाट विजेता हुन सफल भईन । बुटवल पब्लिकमा विद्यालय शिक्षा, तिलोत्तमा कलेजमा प्लस टु गरेकी हुन । आईएमएमटी कलेज योगीकुटीमा ब्याचलर पहिलो वर्षमा अध्ययरत घिमिरे यो अवसर प्लेटफर्मका रूपमा लिएकी छिन। काठमाडौमा हुने फिनालेको लागि प्रतिस्पर्धीहरूलाई तयारी तालिमहरू चलिरहेको छ । बुबाआमा, दिदी र भाइ गरि पाँच जनाको परिवार छन । उनै मिस बेष्ट्रन नेपाल २०२३ ममता घिमिरेसंग बुटवल टुडेकर्मी स्वस्तिक श्रेष्ठले गरेको कुराकानीको अंश ।

मिस नेपाल २०२३ मा प्रतिस्पर्धा गर्न जाँदै हुनुहुन्छ, तयारी कस्तो छ ?
मिस बेष्ट्रन नेपाल २०२३ उपाधि जित्नुुभन्दा अघि दिईएको १६ दिनको तालिम मेरो लागि धेरै सिकाई भयो । यसका साथै थप ज्ञानहरू यु ट्युब सर्च गर्ने तथा पुस्तकहरू पढ्ने गरेको छु । समुदायमा महिलाहरूमा संख्यामा बढि भएपनि नेतृत्वमा पछि परेको छ । म महिलाको एक प्रतिनिधि बनेर समाजमा अगाडि उभिएको छु । यो ठूलो अभिभाराको रूपमा लिएको छु । यसका साथै कलेजको पढाइ समेत ब्यवस्थापन गरेको छु । आफूमाथि जिम्मेवारी बढेको अनुभव भएको छ । परिवारबाट सहयोग मिलेको छ ।

विजेता भएर ताज पहिरिदा हुँदा कस्तो अनुभव भयो ?
पक्कै पनि पहिलोपटक ठूलो उपाधि जित्दा धेरै खुशी लाग्यो । आफुलाई गौरवशाली र भाग्यमानी ठानेको छु । मिस बेष्ट्रन नेपाल २०२३ को ताज स्टेजमा लगाउन पाउँदा विश्वास नै लागेन । एकछिन खुशीको आँसु नै थाम्न सकिन । हिम्मत बाधेको छु । नया बाटोमा हिड्ने एउटा अवसर ठानेको छु । धेरै मेहनतबाट यो उपलब्धि हासिल भएको छ । उपलब्धी हासिल गर्न नियम कानुनमा बाधिनुपर्छ भन्ने राम्रो ज्ञान हासिल गरेको छु । बुटवलकै गौरव बढाउन सफल हुने गरि आगामी दिनमा लाग्ने छु ।

भविष्यमा के बन्ने सोच छ ?
मैले आईटी विषय अध्ययन गरेको हुदा भविष्यमा सफल आईटी ईन्जिनियर बन्ने सोच छ । योसंगै मेरो हबिको रूपमा सौन्दर्य प्रतियोगितालाई लिएको छु । मेरो अध्ययन, पेशालाई सामाजिक क्षेत्रमा जोड्ने लक्ष्य छ । विश्व आईटीको क्षेत्रमा धेरै अगाडि पुगिसकेको छ तर हाम्रो समाज धेरै पछि परेको छ । म समुदायलाई आईटीसंग जोड्ने सोचमा छु । आईटी फिल्डको सहि प्रयोगबारे राम्रो ज्ञान समुदायमा छैन । सर्वसाधारणलाई सुचना प्रविधिको सहि प्रयोग र यसको दुरूपयोगबाट बच्ने बारेमा काम गर्ने लक्ष्य रहेको छ ।

मिस नेपाल प्रतियोगितालाई कसरी हेर्नुहुन्छ ?
यो महिला सशक्तिकरणमा सहयोग गर्ने एउटा महत्वपूर्ण प्रतियोगिता हो । महिलाको शारीरिक मात्र नभई बौद्धिक क्षमता प्रदर्शन गर्ने गरिन्छ । सामाजिक क्षेत्रमा काम गर्ने अवसरको रूपमा लिएको छ । प्रतियोगिताबारे समाजको दृष्टिकोण सकारात्मक ल्याउन थोरै भएपनि भुमिका खेल्नेछु । पुर्व मिस नेपाल श्रृखला खतिवडाबाट प्रभावित भएको म यो क्षेत्रमा अग्रसर भए । खतिवडाले धेरै फरक रूपमा युवाहरूमा भुमिका हुनुपर्ने विषयमा प्रस्तुति दिदै आउनुभएको छ ।

नजिकका आफन्त र साथीभाइहरू के भन्छन ?
यो प्रतियोगितामा भाग लिनुअघि आयोजना भएका सबै तालिमहरू निशुल्क भयो । जसबाट मैले धेरै सिकाई भयो । समाजमा महिलाहरू बिचमा नै धेरै प्रतिस्पर्धा छ । अझ सकारात्मक सोच भएका समाजमा धेरै कम छन । आफुबाट सकारात्मक सोच शुरु गर्नुपर्छ भन्ने मान्यता मेरो छ । परिवारबाट मलाई सहयोग मिलेको छ । मेरो पढाई र यो प्रतियोगिता फरक बिषय छ । ब्यवसायिक रूपमा फरक पाटाहरू छन । हरेक काम गर्दा समाजमा कस्तो समुहको साथ मिलेको छ भन्ने महत्व राख्छ । मैले राम्रो टिम वर्क र परिवारको सहयोग साथ पाएको छु । अब समाजमा रहेको कुसंस्कार र कुरीतिहरूबारे बुझाउन र यसबारे सचेतना जगाउने यो स्टेजलाई सदुपयोग गर्ने छु ।