बुटवल, २७ साउन । लुम्बिनी प्रदेशका सामाजिक विकास मन्त्री चन्द्रकेश (सिके) गुप्ताले नवनियुक्त उपाध्यक्ष लामाको स्वार्थमा लुम्बिनी विकास कोषको सम्पर्क कार्यालय काठमाडौँमा स्थापना गर्न खोजिनु गलत भन्दै उक्त निर्णय तत्काल फिर्ता लिन माग गरेका छन् ।
लुम्बिनी विकास कोषको शुक्रबार बसेको बैठकले कोषको सम्पर्क कार्यालय काठमाडौँमा स्थापना गर्ने सम्बन्धमा आगामी कार्यकारिणी समिति वा परिषद् बैठकमा प्रस्ताव पेश गर्ने निर्णय गरेको थियो ।
शनिबार लुम्बिनीमा पत्रकारहरुसंग कुराकानी गर्दै मन्त्री गुप्ताले उक्त निर्णय फिर्ता नभए स्थानीय बासिन्दा कोषको कार्यालय घेराउदेखि चरणबद्ध आन्दोलनमा उत्रिने चेतावनी दिएका छन् ।
विगतमा काठमाडौंमा रहेको सम्पर्क कार्यालय बन्द गरेको स्मरण गर्दै अहिले फेरि स्थापना गर्न खोज्नुमा जालझेलको आशंका गरे ।
तत्कालीन संस्कृति, पर्यटन तथा नागरिक उड्डयनमन्त्री आनन्द पोखरेलको पालामा काठमाडौंमा रहेको कोषको सम्पर्क कार्यालय हटाइएको थियो ।
मन्त्री गुप्ताले विभागीय मन्त्रालयबाटै सम्पर्क कार्यालयको काम हुन सक्ने भन्दै छुट्टै कार्यालय आवश्यक नभएको बताए ।
मन्त्री गुप्ताले लुम्बिनी विकास कोषका उपाध्यक्ष ल्हारक्याल लामाको नियुक्त रद्द गर्नुपर्ने माग समेत गरेका छन् । लामा विवादित व्यक्ति भएकाले नियुक्ति रद्द हुनुपर्ने र लामालाई सिफारिस गर्ने विभागीय मन्त्रीले माफी माग्नुपर्ने मन्त्री गुप्ताले बताए ।
लुम्बिनी जस्तो पवित्र थलोमा थुप्रै आपराधिक र गैरकानुनी गतिविधिमा मुछिएका व्यक्तिलाई नियुक्त गरिनु सरकारको ठूलो गल्ती भएको टिप्पणी गरे ।
लुम्बिनी क्षेत्रबाटै प्रदेश सभा सदस्यमा निर्वाचित मन्त्री गुप्ताले उक्त प्रस्तावको स्थानिय स्तरमा समेत तिव्र विरोध भएको छ ।
कोषका नवनियुक्त उपाध्यक्ष लामाको अध्यक्षतामा बसेको बैठकमा कोषाध्यक्ष ढुण्डीराज भट्टराई, सदस्य सचिव सानुराजा शाक्य र योजना प्रमुख सरोज भट्टराईले समेत सम्पर्क कार्यालय काठमाडौंमा स्थापना गर्न प्रकृया अघि बढाउने निर्णयमा हस्ताषर गरेका छन् ।
लुम्बिनी होटल संघ, लुम्बिनी बचाउ संघर्ष समिति, लुम्बिनी विकास मञ्चले पनि लुम्बिनी विकास कोषको सम्पर्क कार्यालय पुनः काठमाडौमा स्थापना गर्ने कार्य गलत हुने भन्दै त्यसविरुद्ध स्थानीय आन्दोलित हुने चेतावनी दिएका छन् ।