भैरहवा, २६ साउन ।

एकीकृत सम्पत्ति करमा उल्लेख्य वृद्धि भएको भन्दै चौतर्फी आलोचना भएपछि रुपन्देहीको सिद्धार्थनगर नगरपालिकाले बिहीबार नगरसभाको १४ औं अधिवेशन बोलायो । सर्वत्र चासोको विषय बनेको उक्त नगरसभाको समाचार संकलनका लागि कार्यक्रमस्थल सिद्धार्थनगर–१२ स्थित युनिक बैंक्वेटमा पुगेका बुटवल टुडेका पत्रकार शशि पन्थीलाई नगरपालिकाका प्रेस सल्लाहकार सलमान खानले आन्तरिक कार्यक्रम भन्दै रोके ।

तर, प्रेस सल्लाहकार खानले आन्तरिक कार्यक्रम भनिरहँदा उक्त कार्यक्रमको नगरसभा सदस्य एवं सिद्धार्थनगर नगरपालिका वडा नम्बर ७ का वडा सदस्य अभिषेक रावलले २७ सेकेण्डको भिडियो सामाजिक सञ्जाल फेसबुकमा पोष्ट गरेका छन् । रावल नेपाली कांग्रेसबाट निर्वाचित वडा सदस्य हुन् ।

भिडियोमा नगरपालिकाका प्रमुख प्रशासकीय अधिकृत नवराज पौड्यालले बोलेको सुनिन्छ । आन्तरिक कार्यक्रम भनेर पत्रकारलाई फोटो भिडियो खिच्न नदिनु र कार्यक्रममा ३० सेकेण्ड पनि बस्न नदिनु तर, नगरसभा सदस्यले कार्यक्रमको भिडियो नै सार्वजनिक गर्नु ? कति को जायज होला ? प्रश्नचिन्ह उठेको छ ।

नेपाल पत्रकार महासंघ रुपन्देहीका उपाध्यक्ष अमृता अनमोलले लोकतन्त्रमा जनप्रतिनिधि भनेको नागरिकले चुनेर पठाएका ब्यक्ति भएको हुँदा चुनेर गएपछि पनि उनीहरुले गर्ने काम भनेको कुनैपनि ब्यक्तिगत नहुने बताइन् ।

“जनप्रतिनिधिले नागरिकका हितका लागि गरिने नागरिकका काम हुन्, यसर्थ संविधानले गोप्य राख्न भनेका विशेष बाहेक सुचना लुकाउने, निर्णय लुकाउने, सभा सम्मेलन गोप्यरुपमा गर्ने भनेको निरङ्कुशता हो नागरिकको जान्न पाउने हकमाथिको कुठाराघात हो, यसको विरोध गरिनुपर्छ । सिद्धार्थनगरको नगर सभामा पत्रकारलाई प्रवेशमा रोक्नु गलत हो, यस्तो हुनुहुँदैन”– उनको तर्क छ ।

नेपाल पत्रकार महासंघ रुपन्देहीका पुर्व सचिव राम प्रसाद आचार्यले जनप्रतिनिधिले नै कार्यक्रमको सार्वजनिक गर्ने तर पत्रकारलाई सामान्य सुचनाका लागि रोक्ने, सुचनाबाट बञ्चित गर्ने कार्य गलत भएको बताए । “नगरको विशेष सभा सबैको जन चासोको विषय हो यस्तो सभामा पत्रकारको समेत रुची हुन्छ”– आचार्य भन्छन्, “काठमाडौमा लाइभ गरी कार्यक्रम गर्दा भैरहवामा जनचासोका सभामा पत्रकारलाई रोक्नु दुःखद हो ।”

लुम्बिनी प्रेस क्लवका निवर्तमान अध्यक्ष नरेश केसीले विशेष नगर सभा सबैको चासोको विषय भएकाले जनप्रतिनिधि कसरी प्रस्तुत हुन्छन् भन्ने पत्रकारको समेत चासो भएको हुँदा पत्रकारलाई रोकिनु गलत भएको बताउँछन् । “अहिले संस्थागत कार्यक्रम लाइभ भएका छन्, जनताबाट निर्वाचित जनप्रतिनिधिको सभामा पत्रकारलाई प्रवेशमै रोक लगाउनु आवश्यक नभएको केसीको तर्क छ । जनप्रतिनिधिको ब्यक्तिगत स्वार्थ बाहिर आउँछ कि भनेर त्यस्तो गरिएको हुन सक्छ तर त्यस्तो गरिनु हुँदैन आगामी दिनमा सच्याउनुपर्छ”– केसीले भने ।

सिद्धार्थनगर नगरपालिकाले एकीकृत सम्पत्ति करमा साविकको भन्दा २० प्रतिशत बढाए पनि स्थानीयले विरोध गरेका छन् भने नेकपा एमालेका नगर सभा सदस्यहरुले विशेष नगर सभा बहिस्कार गरेका थिए ।