दाङ, २६ साउन ।

दाङमा धारिलो हतियार (खुकुरी) प्रहार गरी ज्यान मार्ने उद्योगमा ६ जना पक्राउ परेका छन् । पक्राउ पर्नेमा बंगलाचुली गाँउपालिका वडा नं १ जुम्लेपानी घर भई हाल घोराही उपमहानगरपालिका –१८ का २० वर्षका देवेन्द्र कवर मगर, घोराही –१९ सैघा घर भई घोराही –१८ निवासी १७ वर्षका युवक, ं घोराही –१८ मसिना निवासी १५ वर्षका एक युवक, घोराही –१४ गणेश मन्दिर टोल बस्ने निवासी १६ वर्षका एक युवक, घोराही –१८ का १७ वर्षका एक युवक र घोराही उपमहानगरपालिका –१८ भंगीटोल निवासी १७ वर्षका एक युवक गरी छ जनालाई पक्राउ गरेको जिल्ला प्रहरी कार्यालय दाङले जनाएको छ । अपराधमा संलग्न युवाहरु २० वर्ष उमेर भन्दा कम भएकाले नाम नखुलाइएको जनाइएको छ ।

घोराही उपमहानगरपालिका १८ शङ्खे पिपल नजिक लाहुरेडाँडा बस्ने नरबहादुर पुनको छोरा १८ वर्षका तिर्थबहादुर पुनलाई अपरिचत सात जना व्यक्तिहरुको समूहले यही साउन १० गते धारिलो हतियार (खुकुरी) प्रहार गरी घाइते बनाएका थियो । घाइतेको टाउको, अनुहार र बाँयाहातको कान्छी औँला बाहेक सबै औँलाको हड्डी काटिएर गम्भीर घाइते भएको अबस्थामा वडा प्रहरी कार्यालय घोराही दाङको प्रहरी टोलीले फेला पारेको थियो । तत्काल राप्ती स्वास्थ्य विज्ञान प्रतिष्ठान घोराही दाङमा उपचारको लागि पठाइएको थियो । अवस्था गम्भीर भएकाले थप उपचारका लागि साउन ११ गते मेडिकल कलेज भैरहवामा रिफर गरिएको थियो ।

हालसम्म पनि सोही अस्पतालमा उपचार भईरहेको घटना सम्बन्धमा तत्काल खुकुरी प्रहार गर्ने व्यक्तिहरु र खुकुरी प्रहार गर्नुको कारण समेत नखुलेकोमा वारदात स्थल र घटना प्रकृतिलाई विविध प्राविधिक तथा मानवीय तवरबाट अनुसन्धान एवं सो घटना केन्द्रित सर्च अपरेसन चलाई फरार व्यक्तिहरूलाई खोजतलास गर्ने क्रममा १४ दिन पश्चात साउन २४ गते पक्राउ गरिएको हो ।

अनुसन्धानको क्रममा खुल्न आएका सो घटनामा संलग्न व्यक्तिहरूलाई पक्राउ गरिएको जिल्ला प्रहरी कार्यालय दाङका प्रहरी नायव उपरीक्षक एव निमित्त प्रहरी प्रमुख राजनकुमार गौतमले जानकारी दिए । ‘पीडितबाट ज्यान मार्ने उद्योग’ सम्बन्धी कसुरमा जाहेरी लिई दाङ जिल्ला अदालतबाट पाँच दिनको म्याद थप गरी अनुसन्धान कार्य भईरहेको जिल्ला प्रहरी कार्यालय दाङले जनाएको छ ।