चन्द्रौटा (कपिलवस्तु), २५ साउन ।

व्यवसायी नै धरासायी हुनेगरी कर वृद्धि गरेको भन्दै चेम्बर अफ कमर्श कपिलवस्तुले शिवराज नगरपालिकाका मेयर अजय थापालाई ज्ञापन पत्र बुझाएको छ ।

चेम्बर अफ कमर्शका केन्द्रिय सदस्य तथा चेम्बर अफ कमर्श कपिलवस्तुका अध्यक्ष महादेव पोख्रेलको नेतृत्वमा ज्ञापनपत्र बुझाइएको हो । अध्यक्ष पोख्रेल र महासचिव गोपाल प्रसाद बन्जाडेले हस्तक्षर गरेको विज्ञप्तिमा वर्तमान अवस्थामा व्यवसायीहरू निकै मर्कामा परेको, व्यवसयीहरू बैंकको ऋण, व्याज, किस्ता तिर्न नसकेर घर तथा धितो लिलाम हुने अवस्थामा पुगेको छ ।

कतिपय ब्यापारीहरू आत्महत्या गर्नुपर्ने सम्मको अवस्थामा पुगेको, नागरिकहरू आर्थिक मन्दिका कारण आर्थिक गतिविधि गर्न नसक्ने अवस्थामा रहेको जटिल परिस्थितिमा समेत नगरपालिकाले घर बहाल कर, सिफारिस दस्तुर लगायत विभिन्न करमा वृद्धि गरी नागरिक तथा ब्यापारीलाई आर्थिक भार थोपरेकोमा ध्यानाकर्षण पत्रमा उल्लेख गरिएको छ ।

आर्थिक वर्ष ०८०÷०८१ मा तोकिएको राजस्व तथा करलाई सुधार गर्न विज्ञप्तिमा मार्फत सुझाव समेत पेश गरिएको छ । पोख्रेलले स्थानीय सरकार चलाउन करको दायरा बढाएर करको दरमा समेत १० देखि २० प्रतिशत सम्म कर वृद्धि गर्दा ठिकै हुने हुन्थ्यो उनले भने ः “नगरपालिकाले कतिपय शीर्षकमा एकैपटक ४ सय प्रतिशत भन्दा बढीका दरले कर बढाउनु आपत्तिजन रहेको छ ।”

व्यवहारिक अध्ययन बिना बढाइएको कर तत्काल सुधार गर्नुको विकल्प नरहेको उनको भनाई छ । यस्तै बुधबार विज्ञप्ति बुझ्दै मेयर थापाले करको दर र दायराका विषयमा चेम्बर अफ कमर्शका प्रतिनिधि, चन्द्रौटा उद्योग वाणिज्य संघका प्रतिनिधि लगायत सरोकारवालालाई राखेर अन्र्तक्रिया गरिने बताए । नगरपालिकाले पछिल्लो समय स्थलगत अनुगमन गरी पालिकामा दर्ता नभएका उद्योग, कलकारखाना, व्यवसाय, शैक्षिक संस्था, स्वस्थ्य संस्थालाई नगरपालिकामा दर्ता गरी करको दायरामा आउन ताकेता गरेको छ ।

संस्था दर्ता र करको दायरामा ल्याउने विषय उपयुक्त भएपनि करको दरको भारी वृद्धिले भने स्थानीय व्यापारी र आम नागरिक समेत निरास बनेको व्यावसायीहरु बताउँछन् ।