गुल्मी,  जेठ- गुल्मीको छत्रकोट गाउँपालिकाले सञ्चान गरेको लघु उद्यम कार्यक्रमबाट स्थानीय महिलाहरु निकै खुसि बनेका छन । गाउँपालिकाले स्थानीय महिलाहरुलाई आयआर्जनमा सहयोग पुराउने उद्देश्यले लघु उद्यम तालिम दिएपछि उनीहरुमा थप आत्मबल बढेको हो ।
पालिकाले स्थानीय स्तरमै उपलब्ध श्रोत साधनबाट दुनाटपरी, मुढा, खादा, लगायतका सामाग्रि उत्पादन गर्न सिप सिकाएपछि पालिका उक्त सामग्रि निर्माणमा आत्मनिर्भर बन्ने योजनामा छ । पालिकाले स्थानीय महिलाहरुलाई लघु उद्यम तालिम सिकाएपछि महिलाहरुले दुना टपरी निर्माण गर्न लागेका हुन । उत्पादित सामग्रिको प्रवद्र्धनका लागि आउँदा दिनमा छत्रकोट गाउँपालिका भित्र रहेका सरकारी तथा गैह्रसरकारी संघसस्थाले प्लास्टिकका दुनाटपरीको प्रयोग नगर्ने भएको गाउँपालिका अध्यक्ष राम प्रसाद पाण्डेयले बताए ।

गाउँपालिकाले लघु उद्यम कार्यक्रम अन्तर्गत विभिन्न वडाका महिलाहरुलाई छुट्टाछुट्टै तालिम दिई उनीहरुबाट उत्पादित सामग्रिहरुलाई प्रमोट गर्न पहिले पालिका भित्रैबाट अभियान शुरु गर्ने प्रतिबद्धता गरेको प्रमुख प्रशासकीय अधिकृत वीर बहादुर पुनले बताएका छन । ‘अब कार्यालयमा प्लाष्टिकको सामग्रिलाई विस्थापित गरि यहाँ उत्पादित सामग्रिको प्रयोग गर्न शुरु गरेका छौ, त्यसपछि पालिका भित्र पुर्ण रुपमा यो अभियान सञ्चालन गर्ने सोंचमा छौं’, प्रमुख प्रशासकीय अधिकृत पुनले भने ।
छत्रकोट गाउँपालिकाले सालको पातबाट निर्मित दुना टपरी, बाँसबाट बनेको बस्ने मुढा, ढाकाको खादा लगायतका सामग्रिको व्यवसायीक उत्पादन गर्न थालेको छ । छत्रकोट १ हुँगाका १२ जना महिलाहरुले व्यवसायिक रुपमा दुना टपरी उत्पादन गर्न शुरु गरेको वडा अध्यक्ष घनश्याम न्यौपानेले बताए । काम गर्ने जोस र जाँगर भएमा कोहि पनि पछाडी पर्नु नपर्ने भन्दै पालकावाट हुँगामा टपरी खुट्ने (बनाउने) मेसिनको समेत व्यवस्था गरिएको न्यौपानेले बताए ।

घरको अतिरिक्त समयको सदुपयोग गर्दै त्यहाँका उद्यमीहरुले शुरु गरेको व्यवसायबाट अब छत्रकोट गाउँपालिका दुना टपरी उत्पादनमा आत्मनिर्भर बन्ने योजनामा रहेको छ । उनीहरुले उत्पादन गरेको सालको पातको थालीलाई हाल एक सय पिसलाई तीन सय, साना दुनालाई एक रुपैंया र बौतालाई प्रति पिस एक रुपैंया पचास पैसा मूल्य निर्धारण गरिएकोे छ । शुरुशुरुको समय भएको कारण उद्यमीहरुलाई उक्त सामग्रिहरुको स्थायी रुपमा भने अझै मूल्य निर्धारण भने गरिसकेका छैनन ।